SON DƏQİQƏ

belediyyetv.az
 Valyuta məzənnəsi

Bələdiyyələr niyə torpaq maklerinə cevrilib?

31-10-2018, 13:47 | Oxunub: 10 |

Bələdiyyələr niyə torpaq maklerinə cevrilib?
“Azərbaycanda bələdiyyə torpaq makleri obrazında qavranır, biz bu sterotipi sındırmağa çalışırıq”, Bakının Binəqədi qəsəbə bələdiyyəsinin sədri Aytac Əliyeva anews.az-a müsahibəsində belə deyir. “Seçici gəlib bizə səs verdi, indi isə biz onun ayağına getməliyik”, deyərkən gözləri parlayan Aytac Əliyeva 70 min adamın yaşadığı, 40 mindən çox seçicisi olan qəsəbədə bələdiyyənin gördüyü işlərdən şövqlə danışır: “Bakıda ilk bələdiyyəyik ki, qəsəbədə məişət tullantılarını biz daşıyırıq”.
– Aytac xanım, çoxdandı bələdiyyələr bu xidmətin onlara verilməsini istəyir. Siz bu xidməti necə almısız?

– Biz bunu könüllü edirik. Müxtəlif fimarlarla müqavilə bağlamışıq, düzdür, bizim texnikamız var, istəsək, özümüz sürücü, fəhlə götürüb bu işi görərik. Amma bu işi görən firmalarla işləmək daha yaxşıdır. Biz onlara bu xidmətin pulunu ödəyirik, onlar da əhalinin məişət tullantılarını daşıyırlar.
– Əhali bu xidmətin haqqını hara ödəyir?

– Təbii ki, əhali bu xidmətin haqqını bələdiyyə büdcəsinə ödəyir. Məişət tullantıları iki üsulla toplanır: sakinlər tullantıları müəyyən yerlərdə qoyulan qablara atır, maşınla ordan daşınır. İkincisi isə siqnal üsuludur, yəni həftənin müəyyən günlərində maşın məhləyə gedir, siqnal verir, sakinlər də tullantı torbalarını qapılarında maşına verirlər. Biz bununla həm camaatın məişət tullantılarını toplayırıq, həm də sakinlər bu işi bələdiyyənin gördüyünü bildiyindən bələdiyyənin işindən məlumatlı olur. Bundan başqa, biz həm də qəsəbədə bəzi yerlərə pulsuz su çatdırırıq. Çünki həmin məhəllələrə su xətti yoxdur.
– Qəsəbədə su xətləri yoxdur ki?
– Var, hətta elə ərazilərimiz var ki, evinə müddədtsiz su gəlir. Amma bəzi yerlərdə su-kanalizasiya problemi yaşanır. Bu problemi önləmək üçün bələdiyyə maşınla su daşıyır. Təxminən 20 ünvana su daşıyırıq.
– Bələdiyyə bu məhəllələrə su xətti çəkə bilmirmi?
– Xeyr, bu çox vəsait tələb edən dövlət layihəsidir. Hazırda bu istiqamətdə işlər gedir, başa çatanda o ünvanlar da daimi su xətti ilə təmin olunacaqlar. Sadəcə, indi onlar susuz qalmasın deyə bələdiyyənin hesabına sakinlərin gündəlik su ehtiyacı təmin olunur. Biz həm də qəsəbəmizdə yaşayan aztəminatlı ailələrə aylıq yardım edirik, o cümlədən, 24 ailə var ki, uşaqlar orda qəyyumluqdadı, onlara yardım edirik.
– Aytac xanım, bu yardım qərarını siz təkbaşınamı verirsiz?
– Xeyir, təbii ki. Bələdiyyə iclasına çıxarırıq, qəbul olunarsa, həyata keçiririk.

– Qəsəbə ərazisində fəaliyyət göstərən sahibkarlarla bələdiyyə necə işləyir?
– Sıx çalışırıq. Deyək ki, bayramlarda onlar bizə ərzaqla yardım edirlər, biz də o ərzaq paylarını aztəminatlı ailələrə, ehtiyacı olanlara çatdırırıq. Gözləmirik ki, adamlar gəlib qapımızı döysünlər. Onlar seçkidə gəlib bizə səs veriblər. İndi isə biz kabinetdə otura bilmərik, seçicilərin ayağına getməliyik, xidmət etməliyik. Bir az təvəzökarlıqdan uzaq olsa da, Binəqədi bələdiyyələri bir çox yeniliklərə əl atırlar.
– Gördükləriniz işlər, həyata keçirmək istədiyiniz layihələr barədə mütləq yerli icra hakimiyyətinə məlumat verirsizmi?
– Məlumat vermək yox, məlumat paylaşma deyərdim. Səlahiyyət çərçivısində hərəkət edirik.
– Bələdiyyənin təşkilati strukturu necə formalaşıb?
– 15 bələdiyyə üzvü var, onlardan 4-ü bələdiyyədə həm də ştatda işləyir, bələdiyyə sədri, iki müavin və bir daimi komissiyanın sədri. 4 şöbə fəaliyyət göstərir: sənədlərlə və vətəndaşların müraciəti ilə iş şöbəsi, bələdiyyə gəlirləri və yerli gəlirlər şöbəsi, ərazi mülkiyyətinin idarə olunması və təsərrüfat şöbəsidir. Hüquq, ictimaiyyətlə əlaqələr kimi sektorlar da şöbə daxilində fəaliyyət göstərir. Şöbələrin yaradılması seçkidən sonra keçirilən iclasda müəyyən olunur, daxili əsasnaməsi hazırlanır, fəaliyyət istiqamətləri müəyyənləşir və bələdiyyə iclasında təsdiq olunur. Təşkilatlanma ilə bağlı hər hansı problem yoxdur. İşçilərin hər birinin vəzifə təlimatı var və bu da bələdiyyə iclasında təsdiqlənir. Bələdiyyə işçilərimiz üçün yay-qış rejiminə uyğun olaraq uniforma tətbiq olunur. Hətta müqavilə əsasında işləməsinə baxmayaraq, vergi müfəttişlərimizin də uniforması var.

– Qəfil çıxan problemin təcili həlli üçün nə edirsiz?
– Bələdiyyənin fövqəladə iclasını çağırırıq. Burda müvafiq qərarlar qəbul edirik.
– Bəs şöbələrin fəaliyyət planı necə tərtib olunur?
– İllik fəaliyyət planı hazırlanır, bələdiyyə iclasında təsdiqlənir. Büdcə proqnozuna əsasən bu tədbirlər planlaşdırılır. Bir də aylıq konkret tədbirlər planı olur ki, hər ayın sonu müzakirəyə çıxarılır.

– Binəqədi qəsəbəsi bələdiyyəsinin büdcəsi nə qədərdi?
– 2016-cı ildə büdəyə 504 min manat daxil olub, bunun içində vergi rüsumları, ianə və digər ödənişlər var.
– Bu vəsait 70 minə yaxın sakin yaşayan qəsəbə üçün yetərlidimi?
– Bu vəsaitin bir hissəsi bələdiyyənin saxlanma xərclərinə gedir. Yerdə nə qalırsa, qəsəbənin ehtiyaclarına yönəldirik. Təbii ki, gəlirimiz nə qədər çox olsa, o qədər də çox işlər görərik. Amma bu vəsiatlə də qəsəbənin ehtiyaclarını ödəməyə çalışırıq.
– Sakinlər vergiləri ödəyirmi? Çünki bir çox bələdiyyə bundan şikayətçidir.
– Əlbəttə. Çünki sakinlər ödədiyi vegilərin nəticəsində konkret xidmət görürlər. Buna görə də vergi toplanmasında problem yaşamırıq.

– Sizi bələdiyyə öz istehsal sahələrini yaratmağı düşünürmü? Azərbaycanda bələdiyyə strukturunda çatışmayan cəhət kimi vurğulanan məsələlərdən biri də budur.
– Biz artıq buna başlamışıq. İsmayıllı, Gədəbəy və Şəmkir bələdiyyələri ilə tərəfdaşlıq sazişi imzalamışıq və ordakı fermerlərə öz məhsullarını satmaq üçün qəsəbə ərasizində yer ayırmışıq. Yer haqqı digər bazarlara nisbətən ucuz olduğu üçün təşkil etdiyimiz yarmarkada alıcı daha ucuz məhsul ala bilər. Bundan başqa, biz iki layihə hazırlamışıq, ərazimizdə sabun və politilen zavodunun tikilməsini istəyirik. Bu layihələri aidiyyətli dövlət strukturlarına müraciət etmişik və dövlət dəstəyi gözləyirik. Dəstək deyəndə, güzəştli kredit istəyirik. Zavodların tikilib istifadəyə verilməsi həm qəsəbədə işsizliyi azaldacaq, həm də istehsaldan bələdiyyə büdcəsinə vəsait daxil olacaq ki, bu da bizim daha geniş spektirdə işlər görməmizə yardımçı olacaq, kreditimizi də qaytaracağıq. Mən onu da əlavə edim ki, bizdə əmək haqqı da normaldı. Qəsəbənin təmizliyinə baxan işçilərimiz 400-450 manat maaş ala bilirlər, sücürülər təxminən 500 manat alır. Bəzi işsiz sakinlərimiz vergi müfəttişi kimi qeydiyyatdan keçib, 1000-1500 manata qədər gəliri olur. Yığdığı verginin 20 faizi vergi müfəttişinə qayıdır axı. Biz bələdiyyə barədə formalaşan sterotipləri dağıtmağa çalışırıq. Məsələn, enib-qalxması çətin olan ərazilərdə məhəllədaxili martşrutlar açmışıq. Bizim burdan heç bir maddi qazancımız yoxdu. Avtobus şirkətlərindən biri ilə danışmışıq, camaatı simvolik məbləğə, məsələn, 10 qəpiyə daşıyır. Sadəcə, üstünə “bələdiyyə avtobusu” sözlərini yazmışıq. Əsas odu, sakinlər bilsinlər ki, bələdiyyə var və o topraq satmaqla yox, camaata xidmət göstərməklə məşğuldur.
S.Mehdiyeva

31.05.2017

OXŞAR XƏBƏRLƏR
BƏLƏDİYYƏ TV
MÜSAHİBƏ
REPORTAJ
XƏBƏR LENTİ
BÜTÜN XƏBƏRLƏR