Mədəniyyət idarəsinin baş məsləhətçisindən mədəniyyətsiz davranış

Mədəniyyət dedikdə, insanın və cəmiyyətin inkişafının müasir səviyyəsi, insanın yaratdığı, həmçinin nəsildən-nəsilə ötürdüyü maddi və mənəvi dəyərlərin toplusu nəzərdə tutulur.

Bundan əlavə, mədəniyyətə hər bir insanın az və ya çox dərəcədə əldə etdiyi bilik və vərdişlər, savad və tərbiyəsi, eyni zamanda yaradıcılıq və mənəvi-əxlaqı və s. daxildir. Mədəniyyət təkcə insanın mədəni görünməsi üçün deyil, həm də insanın daxilində, varlığında, rəftar və hərəkətlərində özünü göstərməlidir. Faktdır ki, mədəni davranış, mədəni yanaşma və etika kimi anlayışlar uzun əsrlər boyu mövcud olmuş və bu gün də öz aktuallığını saxlamaqdadır. Bu anlayışlar cəmiyyətdə insanların əxlaqa əsaslanan davranış qaydalarını, ünsiyyət formalarını, həmçinin insanın daxili və xarici mədəniyyətini özündə ehtiva edir.

Bundan əlavə, “Dövlət qulluqçularının etik davranış qaydaları haqqında” Azərbaycan Respublikasının Qanunun 6.2.-ci hissəsində qeyd olunub ki, dövlət qulluqçusu dövlət qulluğu ilə bağlı vəzifələrin icrası ilə bir araya sığmayan və onun adına xələl gətirə biləcək, habelə dövlət orqanının nüfuzunu aşağı sala biləcək hərəkətlərə yol verməməlidir. O halda sual oluna bilər ki, Qanunun belə bir tələbinin olduğu halda, görəsən Bərdə Regional Mədəniyyət idarəsinin Yevlax şəhəri üzrə nümayəndəsi, baş məsləhətçi Rafiq Məmmədovun KİV nümayəndəsinin ünvanladığı suala verdiyi cavaba nə ad vermək olar?

Son günlər bir çox media qurumlarında, sosial şəbəkə istifadəçilərinin facebook səhifələrində və s. Yevlax Mədəniyyət Mərkəzinin əməkdaşı Rafiq Məmmədovun mədəniyyətdən kənar danışığı ölkə gündəmini zəbt etməkdədir. Buna əsas səbəb, adı çəkilən bu dövlət qurumunun əməkdaşı Rafiq Məmmədovun, xəbər saytlarından birinin əməkdaşının “Başda İlyas Hacıyev olmaqla Zöhrə Adıgözəlova, siz və Eldəniz müəllim işçilərin maaşlarına əlavə əmək haqqı yazırsınız, sonra da həmin pulları geri alırsınız?” sualına qarşı tərəfin son dərəcə vulqar və əxlaqdan uzaq bir cavabı Bərdə Regional Mədəniyyət idarəsində hökm sürən ab-havanın və həyata keçirilən idarəçiliyin mahiyyətini göstərir. Çünki, Bərdə Regional Mədəniyyət idarəsinin Yevlax şəhəri üzrə nümayəndəsi, baş məsləhətçi Rafiq Məmmədov özündə arxayınçılıq tapmasaydı, o heç bir halda jurnalistin ünvanladığı suala bu cür də cavab verməzdi. O halın varlığına diqqət yetirmək lazımdır ki, bu şəxs uzun illər ərzində mədəniyyət sahəsində çalışıb saçını-saqqalını ağartsa da, hələ də adicə mədəni davranış qaydalarını nümayiş etdirə bilmir. Əslində bu cür yanaşmanın varlığı, Bərdə Regional Mədəniyyət idarəsində və onun tabeliyində fəaliyyət göstərən Yevlax Mədəniyyət Mərkəzində bənzəri olmayan fəlakətin işartılarından xəbər verir.

Onu da qeyd edək ki, bugünə kimi geniş ictimaiyyətdə belə bir düşüncə formalaşıb ki, mədəniyyət sahəsində çalışanlar olduqca mədəni və əxlaqlı olurlar, hər kəsə qarşı nümunəvi davranış və yanaşmaları ilə fərqlənirlər. Yevlax mədəniyyət mərkəzinin əməkdaşı Rafiq Məmmədovun jurnalistin ünvanladığı suala verdiyi cavab isə, artıq bu yöndə formalaşmış düşüncələri tamamilə altüst etməkdədir. Çünki, ortada real faktlar və bu şəxsin əxlaqdan kənar ifadə etdiyi səsyazıları var.

Düşünürük ki, Azərbaycan Respublikası Prezidentinin 05 yanvar 2021-ci il tarixli Sərəncamı ilə, mədəniyyət naziri vəzifəsinə təyin olunan cənab Anar Kərimov, artıq ölkəmizin mədəniyyət sahəsinin “üzqarası” hesab olunan Yevlax mədəniyyət mərkəzinin əməkdaşı Rafiq Məmmədovun əməllərinin araşdırılması yöndə, aidiyyatı üzrə lazımi tapşırıqlarını verəcək. Yəqin ki, o halda adı çəkilən bu şəxs ətrafdakılarla necə davranmağın mədəni qaydalarını mədəni formada başa düşəcək.



P.S Yazını ictimaiyyətə açıqlamazdan əvvəl qarşı tərəfin mövqeyini öyrənmək məqsədi ilə əməkdaşımız Rafiq Məmmədovla əlaqə yaradaraq baş verən danışıqla bağlı onun fikirlərini öyrənmək istəyib. Rafiq Məmmədov jurnalisti təhqir edib soydüyündən peşman olmadığını, əksinə olduqca məmnun olduğunu dilə gətirib. Sitat: Bəli, söymüşəm, düz etmişəm, onun verdiyi o sualın cavabı da belə olmalıydı.

XəbərTv.info