Məktəblərdə şagirdlərdən telefonların yığışdırılması nə dərəcədə doğrudur?

"Şagirdin məktəbə telefon gətirib-gətirməməsinin məktəbdaxili qaydalarla tənzimlənməsi birmənalı olaraq prosesdən direktorların sui-istifadə etmələrinə gətirib çıxaracaq”.

Bunu açıqlamasında təhsil eksperti Kamran Əsədov təhsil naziri Emin Əmrullayevin şagirdlərin məktəbə telefonla gəlməsinin qadağan edilib-edilməməsi məsələsinin məktəbdaxili qaydalarla tənzimlənməsini təklif etməsinə münasibət bildirərkən deyib:

"Hər bir məktəb öz nizamnaməsində fəaliyyətini qeyd edir. Hansı ki, bu nizamnamədə də insanların hüquq və azadlıqları məhdudlaşdırılmamalıdır. Hər hansı bir məsələ nizamnaməyə gətirilirsə, o əsaslandırılmalıdır. Azərbaycan təhsilinin problemləri heç də telefon məsələsində deyil”.

Ekspertin fikrincə, məktəb rəhbərliyi telefonların olmasından ona görə narahatdır ki, fəaliyyətsizliklərinin, yaxud da yanlış fəaliyyətlərinin çəkilib ictimailləşdirilməsindən qorxurlar:

"Düzdür, bir sıra ölkələrdə, məsələn Fransada məktəbdə mobil telefondan istifadə qadağandır. Ancaq bu ölkələrdə tək şagirdlərə deyil, müəllimlərə də qadağandır. Necə yəni müəllimlər hər hansı bir uğurunu, dərsin gedişini selfi edib, paylaşa bilir, uşaqlar nöqsanları paylaşa bilməzlər?”

Həmsöhbətimiz bildirir ki, məktəblərdə telefonların yığışdırılmasına yalnız həmin məktəbə tam mənasında etibar olunduğu halda gedilə bilər:

"Yaxud da məktəblər valideynlərin kənardan izləməsinə imkan verən səslə kameralarla təmin edilməlidir. Amma görünən odur ki, direktorlar həm məsuliyyəti üzərlərinə götürmür, həm də şagirdi prosesdən kənarlaşdırmağa çalışırlar”.

XəbərTv.info