Veteran şahmatçımız: “Dünya çempionatına bir qədər hazırlaşmağım yaxşı olardı”

“Əvvəllər veteranların yarışında iştirak etməmişəm. İlk dəfə iştirak etmək barədə qərar qəbul etdim”.

Xəbərtv.info xəbər verir ki, bunu veteran şahmatçılar arasında Azərbaycan çempionu, tanınmış məşqçi Fikrət Sideifzadə deyib.

O, 14-27 noyabr tarixlərində İtaliyanın Assizi şəhərində FIDE tərəfindən təşkil olunan dünya çempionatında iştirak edəcək. F.Sideifzadə yarışla bağlı təəssüratlarını bildirib:

“Uzun illərdən sonra yenidən şahmat oynamaq o qədər asan deyil. Bu illər ərzində məşqçiliklə məşğul olmuşam. Ona görə çempionatda ciddi çətinliklə üzləşmədim. Hərçənd kifayət qədər çətin partiyalar oldu. Lütfiyar Rüstəmov, Asəf Abdullayev çox yaxşı mübarizə nümayiş etdirdi. Yeganə xanım iştirakçımız Elmira Əliyeva dördüncü yeri tutmaqla yaxşı formada olduğunu göstərdi.

Əvvəlcədən elan olunduğu kimi, Azərbaycan Şahmat Federasiyası qalib şahmatçını və qadınlar arasında ən yaxşı nəticənin sahibini dünya çempionatına göndərəcək. Orada çox maraqlı və gərgin mübarizə gözləyirəm. Böyük fasilədən sonra yenidən qələbə uğrunda yarışmalıyıq. Dünya çempionatında iştirak etmək hər zaman xoşdur. Düşünürəm ki, bir qədər hazırlaşmağım yaxşı olardı. Dünya çempionatı barədə proqnoz vermək düzgün olmaz”.

Qeyd edək ki, beynəlxalq usta və SSSR-i idman ustası olan Fikrət Sideifzadə sovet dönəmində altı dəfə Azərbaycan çempionu olub. 1992-ci ildən isə məşqçilik fəaliyyətinə başlayan Sideifzadə Azərbaycan Respublikasında idmanın inkişafında xidmətlərinə görə “Əməkdar məşqçi” və “Fəxri Bədən Tərbiyəsi və İdman İşçisi” fəxri adlarına layiq görülüb.