YENİ TƏLƏB xəlbirindən keçən partiyalar... - SİYAHI

Partiyalar haqqında bu ilin yanvarın 11-də qəbul edilən yeni qanundan sonra bu günə qədər 28 siyasi təşkilat həmin qanundan irəli gələn tələblərə cavab vermədiyinə görə, öz fəaliyyətinə xitam verməli olub. Bununla belə, 30 siyasi partiya hələ ki, fəaliyyətini davam etdirir.

XəbərTv.info Bizim.Media-ya istinadla fəaliyyətlərini davam etdirən partiyaların siyahısını təqdim edir:

1. Hazırda iqtidarda təmsil olunan Yeni Azərbaycan Partiyası 18 dekabr 1992-ci ildə dövlət qeydiyyatına alınıb. Partiyanın qurucu rəhbəri ümummilli lider Heydər Əliyevdir. YAP-ın hazırki sədri isə Prezident İlham Əliyevdir.

2. Azərbaycan Milli İstiqlal Partiyası

1992-ci ilin 17 iyulunda AMİP müstəqillik illərində dövlət qeydiyyatına alınan ilk siyasi partiya olmağı bacarıb. Partiyanın qurucusu və fəxri lideri Etibar Məmmədovdur. Hazırda AMİP-ə Arzuxan Əlizadə sədrlik edir.

3. Ana Vətən Partiyası

AVP də müstəqillik dönəmində yaranan ilk partiyalardandır. Belə ki, Ana Vətən Partiyası 1992-ci ilin 11 avqustunda rəsmi dövlət qeydiyyatına alınıb. Partiyanın qurucusu olan millət vəkili Fəzail Ağamalı indi də AVP-yə sədrlik edir.

4. Vətəndaş Həmrəyliyi Partiyası

VHP hazırda parlamentdəki təmsilçi sayına görə iqtidarda olan Yeni Azərbaycan Partiyasından sonra ikincidir. Partiyanın 3 nümayəndəsi hazırda Milli Məclisin deputatıdır. 3 noyabr 1992-ci ildə qeydiyyata alınan partiyaya Sabir Rüstəmxanlı rəhbərlik edir.

5. Müsavat Partiyası

Köklü partiyalardan daha biri Müsavat Partiyası da fəaliyyətini davam etdirənlər sırasındadır. 1992-ci ilin 8 dekabrında qeydiyyata alınan Müsavatın qurucu başqanı Ali Sovetin sabiq spikeri İsa Qəmbərdir. Hazırda partiyaya Arif Hacılı sədrlik edir.

6. Ağ Partiya

Əvvəlki adı Vahid Azərbaycan Partiyası olan siyasi təşkilat 1993-cü ilin 13 yanvarında dövlət qeydiyyatına alınıb. 2016-cı ildən etibarən isə təşkilat ad dəyişikliyi edərək, Ağ Partiya olaraq fəaliyyətini davam etdiri. AP-nın başqanı Tural Abbaslıdır.

7. Ümid Partiyası

Ümid Partiyası 1993-cü ilin 5 mayında dövlət qeydiyyatına alınıb. Partiyanın sədri sabiq millət vəkili İqbal Ağazadədir.

8. Azərbaycan Demokratik Maarifçilik Partiyası¸

ADMP 1995-ci ilin 4 avqustunda qeydə alınıb. Uzun illərdir parlamentdə təmsil olunan partiyanın sədri Elşən Musayevdir. O, hazırda Milli Məclisin deputatıdır.

9. Azərbaycan Xalq Cəbhəsi Partiyası

Qurucu rəhbəri sabiq Prezident Əbülfəz Elçibəydir. SSRİ dönəmindən hərəkat formasında fəaliyyət göstərən Xalq Cəbhəsi 1995-ci ilin 1 sentyabrından rəsmi qeydiyyatdadır. AXCP-nin sədri Əli Kərimlidir.

10. Vəhdət Partiyası

Daha bir parlament partiyası olan Vəhdət 1998-ci il dekabrın 11-dən rəsmən fəaliyyət göstərir. Partiyaya Ali Məhkəmənin sabiq sədri Tahir Kərimli rəhbərlik edir. O, həmçinin Milli Məclisin deputatıdır.

11. Azərbaycan Xalq Partiyası

AXP-yə isə sabiq Baş nazir Pənah Hüseyn rəhbərlik edir. 1998-ci ildə təsis edilmiş partiya 1999-cu ildən dövlət qeydiyyatındadır. Pənah Hüseyn 2005-ci ildə sədrlikdən istefa versə də, 2012-ci ildə yenidən sədr seçilib.

12. Azərbaycan Demokrat Partiyası

ADP-nin sədri Sərdar Cəlaloğludur. Partiya 2000-ci il fevralın 3-dən qeydiyyatdadır.

13. Ədalət Partiyası

Sabiq baş prokuror İlyas İsmayıl Ədalət Partiyasına sədrlik edir. Siyasi təşkilat 2002-ci ildə rəsmi qeydiyyatdadır.

14. Müasir Müsavat Partiyası

Hafiz Hacıyevın sədrlik etdiyi Müasir Müsavat Partiyası da fəaliyyətini davam etdirir. MMP 2002-ci ilin 8 mayından fəaliyyət göstərir.

15. Böyük Quruluş Partiyası

Parlament partiyalarından daha biri Böyük Quruluş Partiyası da fəaliyyətdə olan partiyalardandır. Təşkilat 2005-ci il avqustun 12-də qeydə alınıb. Sədri isə Milli Məclisin deputatı Fazil Mustafadır.

16. Azadlıq Partiyası

Əhməd Orucun sədrlik etdiyi Azadlıq Partiyası 2005-ci il 12 avqustunda dövlət qeydiyyatına alınıb.

17. Bütöv Azərbaycan Xalq Cəbhəsi Partiyası

Aktiv siyasi fəaliyyətini davam etdirən partiyalardan biri də BAXCP-dir. 2005-ci ilin 12 avqustunda rəsmi qeydiyyata alınan partiyaya Qüdrət Həsənquliyev sədrlik edir. Q.Həsənquliyev həm də parlamentin deputatıdır.

18. Azərbaycan Milli Dövlətçilik Partiyası

AzMDP-na Meydan hərəkatının öncüllərindən olan Nemət Pənahlı rəhbərlik edir. Təşkilat 1994-cü il 12 oktyabr tarixindən rəsmi fəaliyyətdədir.

19. Azərbaycan Demokratik İslahatlar Partiyası

ADİP də parlamentdə təmsil olunan partiyalardandır. Partiyanın sədri Asim Mollazadə Milli Məclisin deputatıdır. ADİP 2005-ci il avqustun 12-də qeydə alınıb.

20. Böyük Azərbaycan Partiyası

BAP-a sabiq AMİP-çi Elşad Musayev sədrlik edir. Təşkilat 2005-ci il 12 avqustda dövlət qediyyatına alınıb.

21. Klassik Xalq Cəbhəsi Partiyası

KXCP 2007-ci ilin 31 yanvarından rəsmi qeydiyyatdadır. Partiyaya Mirmahmud Mirəlioğlu sədrlik edir.

22. Milli Dirçəliş Hərəkatı Partiyası

MDHP-yə sədri sabiq millət vəkili Fərəc Quliyevdir. Partiya 31 may 2011-ci ildən qeydiyyatdadır.

23. Azad Demokratlar Partiyası

AzDP-nin sədri Sülhəddin Əkbərdir. Partiya 2020-ci il 16 apreldə qeydiyyata alınıb.

24. Milli Cəbhə Partiyası

Parlamentdə təmsil olunan partiyalardan olan MCP-də fəaliyyətini davam etdirir. Partiyaya millət vəkili Razi Nurullayev sədrlik edir. 31 avqust 2020-də rəsmi qeydiyyata alınıb.

25. Respublikaçı Alternativ Partiyası

REAL da fəaliyyətini davam etdirən partiyalar sırasındadır. REAL-ın sədri İlqar Məmmədovdur. Parlament partiyalarından olan REAL-ın Milli Məclisdəki təmsilçisi isə Erkin Qədirlidir. Partiya 31 avqust 2020-ci ildən rəsmən fəaliyyətdədir.

26. Gələcək Azərbaycan Partiyası

GAP-ın sədri Ağasif Şakiroğlu, fəxri lideri isə Milli Məclisin sabiq spikeri Rəsul Quliyevdir. Partiyanın qeydiyyat tarixi 15 dekabr 2020-ci ildir.

27. Haqq Ədalət Partiyası

15 oktyabr 2021-ci ildə dövlət qeydiyyatına alınan HƏP-ə sabiq səhiyyə naziri Əli İnsanov rəhbərlik edir.

28. Azad Vətən Partiyası

Ən gənc partiya hesab olunan Azad Vətən Partiyası 5 sentyabr 2022-ci ildə dövlət qeydiyyatına alınıb. Partiyaya sabiq QAT rəhbəri Akif Nağı sədrlik edir.

29. Yeni Zaman Partiyası

Partiyanın sədri Musa Ağayevdir. Təşkilat 16 aprel 2020-ci ildə qeydiyyata alınıb.

Qeyd edək ki, siyahıda hələ də rəsmi şəkildə buraxıldığını elan etməyən partiyalar yer alıb. Lakin Azad Demokratlar Partiyasının da tezliklə fəaliyyətini dayandıracağı gözlənilir. Bununla yanaşı, Yeni Zaman, Milli Dövlətçilik və Azadlıq partiyalarının da fəaliyyətini davam etdirib-etdirməyəcəyi sual altındadır.