"Azərbaycan hücuma keçəcək - Tarix artıq bəllidir"

“Mən Azərbaycanla müzakirə olunan sənədin bir neçə variantı ilə tanış olmuş deputatam. Biz dəfələrlə prosesin ilkin şərtləri ilə bağlı xəbərdarlıq etmişik. Azərbaycan yeni ərazi tələbləri ilə çıxış edir. Qarabağ məsələsini bağlamağımız tələb olunur. Hələ bu azmış kimi on minlərlə azərbaycanlını burada məskunlaşdırmaq istəyir”.

Bu sözləri parlamentin “Ermənistan” fraksiyasının deputatı Kristin Vardanyan bildirib.

O, daha sonra fikirlərini belə davam etdirib: “Əraziləri verməklə ontoloji böhrandan çıxa bilmərik. Azərbaycan davamlı olaraq tələblərini artırır. Ən azı son 4 ildə bu, özünü göstərdi. Azərbaycan indiki mərhələdə nə istəyir: güc yolu ilə və ya güc təhdidi ilə əldə etdiklərini, yəni Qarabağa nəzarətini möhkəmləndirmək və gələcək hüquqlarımız uğrunda mübarizədə bizə kömək edə biləcək bütün hüquqi əsasları, platformaları məhv etmək?

Azərbaycan yaxşı bilir ki, ölkədə vəziyyətin dəyişməsi bölgədə vəziyyətin dəyişməsinə gətirib çıxarır. 1992-94-cü illərdə nə baş verdi? Azərbaycanda zəifləmiş daxili güc, daimi hakimiyyət dəyişiklikləri, bunun nəticəsi də döyüş meydanında vəziyyətin dəyişməsi idi. 1994-cü ildə atəşkəs tələb edən və münaqişəyə son qoymaq istəyən bu münaqişənin məğlub tərəfi məhz 1994-cü ildə Azərbaycan oldu. Onlar fasilə verdilər, ölkədə məntiqi dəyişdilər. Bununla da hər şey 180 dərəcə dəyişdi: İndi biz məğlub tərəfik, Azərbaycan qalib tərəfdir. Ona görə də Azərbaycan bilir ki, indi daha çox ərazilərə nəzarət etməklə qalibiyyətini möhkəmləndirməlidir.

İndiki mərhələdə heç kim demir ki, gedib əraziləri almalıyıq. İstəyimiz odur ki, heç olmasa haqqımızdan əl çəkməyək, haqq-ədalət uğrunda mübarizədən əl çəkməyək. Bəlkə indi uduzan tərəf olsaq da, vaxt gələcək bu reallıq dəyişəcək. Kim deyir ki, məğlubiyyət hökmdür? Bunu ən yaxşı Azərbaycan bilir. İndiyədək əlimizdə Azərbaycanın Qarabağ üzərində yurisdiksiyasının tanındığı sənəd yoxdur. Bizdə ancaq Nikol Paşinyanın bəyanatı var, amma hələ ki, Ermənistan adından imzalanmış sənəd yoxdur ki, bunu sənədləşdirək. Deməli, Bakıya həmin sənəd lazımdır. Onun üçün problem yarada biləcək bütün platformaların məhvinə ehtiyacı var.

Azərbaycan beynəlxalq münasibətlərdə öz problemlərini həll etmək üçün güc tətbiq etmə hədəsindən istifadə edir. Azərbaycan üçün daha bir mühüm tələb ondan ibarətdir ki, onun gələcək tələbləri heç bir şəkildə məhdudlaşdırılmamalıdır, yəni onun artıq keçə bilməyəcəyi bir xətt yoxdur”.

O qeyd edib ki, Azərbaycana sülh lazım deyil. “Hakim hakimiyyət üzvlərindən biri desin: Azərbaycan nədən imtina edir? Xarici İşlər Nazirliyi artıq hücumun nə vaxt baş verəcəyini artıq göstərib. COP-29 konfransından sonra azərbaycanlıların hücum riski çox yüksəkdir. Bizə günlərlə, saatlarla müharibədən danışırlar. Azərbaycan Xarici İşlər Nazirliyinin son bəyanatı da belə oldu ki, hücuma hazırlaşırlar. Yəni bu nə deməkdir? Ermənistanın hərbi təlimlər keçirməyə, silah almağa ixtiyarı yoxdur?! Bunu Azərbaycan üçün təhlükə hesab edirlər və bu təhlükəni zərərsizləşdirməlidirlər?! Axı harda yazılıb ki, hər hansı bir ölkə hərbi təlim keçirsə, kiməsə hücum edəcək?! Onlar bu yaxınlarda müxtəlif ölkələrlə 60-dan çox hərbi təlim keçiriblər. Siz təsəvvür edə bilərsinizmi ki, Ermənistan deyir ki, Azərbaycan İran və ya Türkiyə ilə hərbi təlimlər keçirir, mən bunu təhdid kimi qəbul edirəm və Azərbaycana hücum edirəm?

Tavuşda torpaq verməklə Azərbaycanı dayandıra bilərikmi, Tiqranaşeni verməklə onun qarşısını ala bilərikmi? “Azərbaycan Qarabağın təhvil verilməsi ilə dayandı? Münaqişənin mahiyyəti budur ki, biz bunu başa düşməliyik”.(Konkret.az)

Xebertv.info