Rektorun şübhəli elmi yaradıcılığı... - İTTİHAM

Azərbaycan Dövlət Aqrar Universitetinin (ADAU) rektoru, AMEA-nın müxbir üzvü, akademik İbrahim Cəfərovun "müəllifi" olduğu dərsliklərin və elmi yaradıcılığının tamamilə plagiat məhsul olduğu üzə çıxır.
Rektorun illər əvvəl müəllifi kimi ADAU-ya və elmi ictimaiyyətə sırıdığı "Fitopotologiya" və "Fitoterapiya" adlı dərsliklər rus alimlərinin eyniadlı kitablarının eynən "oğurlanması" sayəsində meydana çıxıb. Yəni, Gəncənin akademik rektorunun adıçəkilən kitabları plagiatdır.

Ölkəmizin yeganə aqrar təhsil ocağının professor-müəllim heyəti də günlərdir ki, hamılıqla öz rəhbərlərinin bu utancverici əməlindən danışır. Adamın inanmağı gəlmir, amma...

"Demokratik.Az"-a verilən özəl məlumatlara görə, kollektiv İbrahim Cəfərovun bütün elmi fəaliyyətinin dərindən araşdırılmasını, qeyri və saxta yollarla qamarladığı akademik, professor elmi adlarının, hətta dosentliyinin əlindən alınmasını şəstlə tələb edirlər. Əslində haqlıdırlar da, akademik adı almaq yolunda saxta kitabi-külliyyat yaradan Cəfərova heç bir bəraət də düşmür.
Bununla əlaqədar ölkə rəhbərliyinə və aidiyyatı qurumlara müraciət etməyə hazırlaşan qocaman müəllimlərin bir neçəsinin saytımıza bildirdiyinə görə, son illər ADAU-da qaynamaqda olan önəmli problemlərin kökündə də rektor İbrahim Cəfərovun elmdən - tədrisdən bixəbər olması durur. Bu səbəbdəndir ki, universitet ölkənin aqrar kadr patensialının ödənilməsi üçün real nəticələrə hələ nail ola bilmir. Universitetdə elmi tənəzzül gedir, tədris prosesləri süni və formal xarakter alır, ADAU dünyanın təhsil ocaqlarının reytinq cədvəlində müsbət irəliləyişlərə imza atmır. Ən əsası, yeganə aqrar təhsil müəssisəsindən elmi ad alanların sayı azalır, alanların əksəri isə öz "yaradıcılıqlarında" plagiat savadı suya düşən rektorlarını yamsılayır.

ADAU-nun axsayan tədrisi dirçəldilmir, son illəri demək olar ki, fərdi maraq və qabiliyyətsizliyin güdazına gedir.

"Fitoterapiya" yoxsa - ili "Химическая защита растений"

"Demokratik.Az"-a sızan informasiyalar əsasında müəyyən edə bildik ki, İbrahim Cəfərovun ruscadan çaldığı "Fitoterapiya" (Bitkilərin kimyəvi mühafizəsi) dərslik kitabı 2002-ci ildə "Elm" nəşriyyatında 232 səhifə olmaqla işıq üzü görüb. Kitab Azərbaycan Respublikası Təhsil Nazirliyinin 08 avqust 2001-ci il tarixli 888 saylı əmrinə əsasən ali məktəb tələbələri üçün dərslik kimi təsdiq edilib.

Plagiat kitabın elmi redaktoru AKTA-nın (indiki ADAU-nun) Kimya Kafedrasının professoru, biologiya elmləri doktoru Xəlilov Qəhrəman Bəndalı oğlu olub. Elə rəyçiləri də AKTA-dan seçilib - biri o zaman AKTA-da kafedra müdiri olan KT elmlər doktoru Əliyev Tahir Əli oğlu, digəri isə AKTA-nın kimyaçı professoru, KT elmləri doktoru Yusifov Nazim Məhəmməd oğlu olub.

Açıq-aydın görünür ki, bu kitaba "rəy" yazan və məsuliyyətsizcə elmi redaktorluq edənlər həmin illərdə öz dekanları İ.Cəfərova yarınmaq üçün bu elmi rəzalətə qol qoyublar.

Dərsliyin rusca orijinalı 14.01.1987-ci ildə rus alimləri Georgi Sergeeviç Qruzdev və V.A.Zincenko, V.A.Kalinin və başqalarının müəllifliyi ilə "Ximiçeskaya Zaşita Rasteniy" adı ilə ali məktəblər üçün dərslik kimi 30 min tirajla Rusiya paytaxtı Moskvada dərc edilib. Buna artıq şübhəsi olanlar İ.Cəfərovun plagiat "Fitoterapiya" kitabını aşağıda təqdim etdiyimiz onlayn elektron mənbə ilə tutuşdursalar yetərli olar.

Bax - https://www.twirpx.com/file/906544/

İ.Cəfərovun "Fitopatologiya" "kitabı da plagiatdır?


Rəsmi məlumatlara istinadən "dərslik oğrusu" 1985-1988-ci illərdə K.A.Timiryazev adına Moskva Kənd Təsərrüfatı Akademiyasında "Fitopatologiya" kafedrasının əyani aspirantı olub. İndinin özündə rusca səlis nitqi olmayan, rusca minimal elmi-tədqiqi bilgilərə belə sahib olmayan İbrahim Cəfərov 13 fevral 1989-cu ildə SSRİ Nazirlər Soveti yanında Ali Attestasiya Komissiyasının qərarı ilə kənd təsərrüfatı elmləri namizədi elmi dərəcəsini ala bilib. Ehtimal ki, hazırki rektorun karyera yüksəlişində həmin təhsil illərinin təsiri olduğu kimi, sözügedən dərsliklərin plagiatlıq ideyası da rusca aspiranturalığına bağlıdır.

Təsadüfi deyil ki, rektor aspirant olarkən rusca eyniadlı və eynitərtibli dərsliklərlə əyani tanışlığı qaçılmaz olub və həmin kitablar böyük ehtimal ki, indi də onun ən sevimli mütaliə kitablarıdır. Amma indi o dərslikləri öz dilində oxuyan rektor kitabların müəllifliyini öz əlinə alıb.

Haqq-ədalət naminə söyləmək lazım ki, "Fitopatologiya" kitabı bir neçə əlavə və redaktələrlə xeyli göz oxşayır, plagiat olduğunu sapdırmağa çalışır. Amma çifayda, bu kitabın da mündəricat və mövzuları rusca elmi mənbələrlə eyniyyətdədir. Bundan başqa, akademik rütbəli İbrahim Cəfərovun rəsmi "wikipedia" məlumatlarında özü barədə yer alan bilgilər, elmi məqalələr adamı rusca bir çox köhnəlmiş köçürülmə materiallara aparır. Amma, həmin çeynənmiş və yeni yanaşmaları olmayan aqrar-elmi məqalələrdə də müəllif kimi İ.Cəfərov imzası yer alır.

BAX - https://az.wikipedia.org/wiki/İbrahim_Cəfərov

ADAU rektoru İbrahim Cəfərovun elmi adları ilə yanaşı, elmi dərəcələri və dissertasiya işləri də maraq doğurur. Bu barədə internet resurslarında səhih məlumatlar yerləşdirilməsə də, "Demokratik.Az"-ın əldə etdiyi məlumata görə, rektor doktorluq dissertasiyasını 2005-ci ilin iyununda müdafiə edib, Azərbaycan Respublikası Prezidenti yanında Ali Attestasiya Komissiyasının 16 iyun 2006-cı il tarixli qərarı ilə kənd təsərrüfatı elmləri doktoru elmi dərəcəsi alıb.

İddia edilir ki, adam bu elmi dərəcəsini də alarkən orijinallığa, elmi novatorluğa söykənməyib. Alimin gizlətməyə çalışdığı elmi tədqiqatlarının nəticəsində bitki-mühafizə mövzusunda hansısa kəşfinə, dissertasiyalarında müvafiq tələblərin özünəməxsus tərzdə ödənilməsinə də ümumiyyətlə rast gəlinmir.

Aqronom alimlərdən birinin dediyi kimi, əgər rektor belə güclü alimdirsə, heç olmazsa yerli bitkilərin xəstəliklərinin əleyhinə bircə dərman preparatı kəşf etdiyini deyə bilərmi?

Maraqlısı həm də odur ki, cənab Cəfərov 2008-ci ildə - cəmi 2 il sonra gözlənilmədən doktorluq dissertasiyası "yazdığı" Azərbaycan Elmi-Tədqiqat Əkinçilik İnstitunun nəzdində fəaliyyət göstərən FD 04.012 Müdafiə Şurasının həmsədri və sədr müavini seçilib.

Bundan başqa, 2015-ci ildən Azərbaycan Respublikasının Prezidenti yanında Ali Attestasiya Komissiyasının 24 fevral 2015-ci il tarixli 46 nömrəli əmri ilə Azərbaycan Dövlət Aqrar Universitetinin nəzdində fəlsəfə doktoru elmi dərəcəsi almaq üçün təqdim olunan dissertasiyaların müdafiəsini keçirən FD.04.131 dissertasiya şurasının sədri də məhz dərslikləri plagiat, elmi dərəcələrinin halallığı da xeyli şübhə doğuran rektorun - akademik İbrahim Cəfərovun özüdür.

Dərslikləri köçürüb (tərcümə etdirib) öz adına çımış bir akademikin, şübhəli aqrar professorun hansı ali düşüncə və elmi potensialı ilə ET Əkinçilik İnstitutunda və rəhbərlik etdiyi ADAU-da "doktor" adları paylaması da araşdırılmalı, imzaladığı kağızlar geri oxunmalı, son illər müəssisədaxili elmi dərəcə alanların nəticələri ləğv edilməlidir.

Beləcə, ciddi və əsaslı faktlara dayanaraq deyə bilərik ki, təyinatından üzü bəri şəffaflıqdan və elmi-praktiki tərəqqidən dəm vuran ADAU rektorunun daşıdığı bütün elmi adları özünün real elmi bilik səviyyəsilə həqiqətən açıq ziddiyyət təşkil edir. Rektorun bir müəllim kimi də tələbələrə bilik ötürücülüyündə nəzərə çarpan nöqsan və qüsurlar var ki, "youtube"-da yayımlanan açıq dərslərin keyfiyyəti dediklərimizin əyani isbatıdır.

(Bax - https://youtu.be/EdOgirf2IRk) Rektorun mühazirələrindən görünür ki, o heç özü 15 ildir ki, "müəllifi" olduğu dərsliyi - fənnini mənimsəyə bilməyib və necə dərs keçir.

Ortadakı biabırçı mənzərə rektor İbrahim Cəfərovun elmi adlarının və elmi dərəcələrinin ləğvini ehtiva edir. Amma tələsməyək, inanaq ki, süni elmi adlar və elmi dərəcələr alan, plagiat dərsliklərlə akademik rütbəyə yiyələnən, tələbələrini, ictimaiyyəti və Təhsil Nazirliyini, eləcə də tabe olduğu Kənd Təsərrüfatı Nazirliyini uzun illərdir ki, aldadan rektor İbrahim Cəfərovun şübhəli külli-yaradıcılığı aidiyyatı şəxslər vasitəsilə daha dərindən araşdırılacaq. Bəlkə mütəxəssislərimiz deyəcəklər ki, rus alimləri dərsliyi və elmi məqalələri məhz İbrahim Cəfərovdan oğurlayıb?!

İbrahim Cəfərov elmi maxinasiyaları üzündən cəzalandırılarsa, bu həm də milli elmi tərəqqi naminə xoş presedent yaradardı. Digər plagiat və saxta elm adamları üçün isə bir nümunə, alimliyə can atan novator gəncliyə görk olardı!...

Adıkeçən akademikin söz haqqına sayğısını ifadə edir...

(mövzu diqqətimizdədir)

Demokratik.Az