"Dınqıra süzən qurumsaq"

Ağsaqqallar Şurası üzvünün ağ saqqalına yaraşmayan vulqar hərəkətinə don geyindirməyə çalışanlar arasında cəmiyyətdə kifayət qədər tanınan şəxslər də oldu. Biri deyir bu onun şəxsi həyatıdır, müdaxilə etmək olmaz. Digəri isə katibənin qulağının yaxşı eşitmədiyi üçün Mirələmovun onu bu formada çağırdığını bəyan edir. Görəsən, bunu deyənlər özləri öz dediklərinə inanırlarmı? Yoxsa elə onlar da bu "ağsaqqal" kimi ahıl vaxtlarında yorğalamağa meyillidirər?

Düzdür, yayımlanan videoda xanımın üzünün açıq göstərilməsi ilə mən də razı deyiləm. Deyilənə görə, qadın ailəlidir, yəqin ki, övladları da var. Və bu görüntülər onlar üçün bir ləkə, utanc verici hal olaraq həmişəlik qalacaq. Ancaq Mirələmovun öz nüfuzundan, maddi imkanından istifadə edərək ehtiyacı olan birinə qarşı belə hərəkətlər etməsi əxlaqsızlığın "pik nöqtə"sidir.

Ehtiyac dedikdə mən qadının "əllənmək" müqabilində Mirələmovdan pul aldığını nəzərdə tutmuram. Ancaq ən azından işini itirmək qorxusu onu düşdüyü bu vəziyyətlə barışmağa məcbur edib. Məlum məsələdir ki, xanım bu yetmiş altı yaşlı qocanın olmayan qara qaşlarına, qara gözlərinə vurulmayıb.

Bir sözlə Hüseynbala Mirələmovun etdiyi bu hərəkət nə onun yazıçı, professor, sabiq millət vəkili adına, nə də ağsaqqal adına heç cür yaraşmır.

Burada Cahandar ağanın molla Sadığa dediyi bir söz yadıma düşdü: "Dınqıra süzən qurumsaq!"

Rafael Şekixanov