Sarkozi 1 il həbsdə qalacaq

Fransanın keçmiş Prezidenti Nikolya Sarkozi korrupsiya və nüfuz alverində ittiham olunur. Eyni zamanda prokurorluq, Nikolya Sarkozinin kassasiya məhkəməsinin bir əməkdaşına rüşvət verməyə çalışdığını iddia edir.

Paris məhkəməsi keçmiş Fransa Prezidenti Nikolya Sarkozini korrupsiya və nüfuz alverində təqsirləndirərək üç il həbs cəzasına məhkum edib. Həbs cəzasının bir ili həqiqi bir müddət, ikisinin isə təxirə salınmış müddət olacağ bildirilib.

Bununla yanaşı Sarkozi, prezidentlik kampaniyasının qanunsuz maliyyələşdirilməsinə dair istintaq məlumatlarını Fransa kassasiya məhkəməsinin əməkdaşı olan Jilber Aziberdən qanunsuz şəkildə əldə etməyə çalışmaqda günahlandırılır. Belə ki, Sarkozi vəkili Tierri Erzog vasitəsi ilə Aziberə Monakoda prestijli vəzifə almasına kömək edəcəyinə söz verib. Sübut kimi isə Sarkozi ilə Erzog arasında 2013-2014-cü illərdə tutulan telefon danışıqlarının səs yazıları göstərilib. Bu söhbətlər zamanı həmsöhbətlər heç vaxt bir-birlərini əsl adları ilə çağırmayıblar və Sarkozi Pol Bismut təxəllüsündən istifadə edib. Lakin, ekspertiza danışan şəxsin keçmiş prezident olduğunu müəyyənləşdirə bilib.

Sarkozinin vəkili Jaklin Laffont, telefon danışığına qanun pozuntusu kimi qiymətləndiriləcək faktın olmadığını bildirərək "Bu, sadəcə səmimi söhbət idi",-deyə qeyd edib.

Xatırladaq ki, 2012-ci ildə prezidentlikdən ayrılan Sarkozi korrupsiya ittihamları ilə üz-üzədir. Fransa, Sarkozinin 2007-ci il prezidentlik kampaniyasının Liviya lideri Müəmmar Qəddafi tərəfindən maliyyələşdirilməsini araşdırmağa davam edir.

XeberTv.info