Son dəqiqə
Kriminal
10-11-2021, 15:21
435
Dələduzluqda ittiham olunan sabiq polis əməkdaşına hökm oxundu
İki nəfərə qarşı dələduzluqda ittiham olunan, Bakı Ağır Cinayətlər Məhkəməsində mühakimə edilən sabiq polis əməkdaşı İbrahim Babaşovun cinayət işi üzrə məhkəmə istintaqı yekunlaşıb.
Prosesdə hökm oxunub. Hökmə əsasən, Babaşov 7 il 6 ay müddətinə azadlıqdan məhrum edilib.
İttihama görə, Babaşov tanışları Şahin Hüseynov və Emin Əsədovdan 60 min manata yaxın pul alaraq onların barəsində DTX-də açılan cinayət işinə xitam verdirəcəyini bildirib.
Məhkəmə araşdırması zamanı məlum olub ki, Şahin və Emin qaçaqmalçılıqda, ölkə ərazisinə idmançıların istifadə etdiyi dərmanları qanunsuz gətirməkdə ittiham olunublar. İbrahim Babaşov pulu aldıqdan sonra hər iki şəxsi uzun müddət aldadıb. Onlara vəzifəli şəxslərlə daimi görüşlərdə olduğu üçün zənglərə tez-tez cavab verə bilmədiyini deyib.
O, pul aldığı şəxslərin ona yazdığı mesajlara “sizin işlə bağlı ağsaqqalın yanındayam”, “vacib görüşdəyəm”, “iş mənim nəzarətimdədir” kimi bu tipli cavablar yazıb.
Daha sonra cinayət işinin istintaqı DTX-dən Dövlət Gömrük Komitəsinə göndərilib. Bundan xəbər tutan zərərçəkmişlər yenidən İbrahim Babaşovla əlaqə saxlayıblar. Babaşov vəziyyətdən istifadə edərək pul aldığı şəxslərə deyib ki, işin DTX-dən Dövlət Gömrük Komitəsinə göndərilməsini guya özü təşkil edib. Amma gec-tez yalanı ortaya çıxıb. Hər iki zərərçəkmiş hüquq-mühafizə orqanlarına müraciət ediblər.
XəbərTv.info