Edamına saatlar qalmış məhbusun son sözləri - Xalası qızı ilə ərini öldürüb - FOTO

Aprelin 9-da ABŞ-nin Missuri ştatında 2006-cı ildə xalası qızı və onun ərini qətlə yetirmiş Brayan Dorsi həbsxana işçilərinin əfv çağırışlarına baxmayaraq, ölümcül iynə vurularaq edam edilib.

Bu barədə Missuri İslah Departamenti məlumat yayıb.

Bildirilib ki, Brayan Dorsi yerli vaxtla saat 18:11-də (Bakı vaxtı ilə aprelin 10-da saat 03:11-də) keçinib. Edam Bonn-Terre Dövlət Həbsxanasında sedativ pentobarbitalın bir dozası ilə həyata keçirilib.

Dorsinin vəkilləri onun həbsxanada olduğu müddətdə islah olunduğunu və məhkəmə zamanı lazımi hüquqi müdafiəyə malik olmadığını irəli sürüblər.

ABŞ Ali Məhkəməsi edamın ertələnməsi ilə bağlı iki vəsatəti təmin etməyib. Qubernator Mayk Parson da əfv müraciətini rədd edib. Ştat rəhbəri prokurorluğun ittihamına istinad edərək Dorsinin xalası qızını qətlə yetirdikdən sonra zorladığını deyib. Lakin Dorsinin vəkilləri bu ittihamı təkzib edərək bunun məhkəmədə sübut olunmadığını bildiriblər.

Dorsi hücumdan üç gün sonra polisə təslim olub. O, günahını etiraf edib.

O, Missuri ştatında 2023-cü ildə dörd nəfərin edam edilməsindən sonra bu il edam edilən ilk məhbusdur.

Vəkillərin sözlərinə görə, o, son 17 ildə həbsxana bərbəri işləyib, personalın saçını kəsirdi, törətdiyi cinayətlərə görə peşman olub və nümunəvi məhbusa çevrilib.

Dorsinin müdafiəsi onun Milad bayramına iki gün qalmış hücum zamanı narkotikdən qaynaqlanan psixozdan əziyyət çəkdiyini və məhkəmə zamanı vəkillərinin maliyyə maraqları toqquşması ilə üzləşdiyini irəli sürüb.

Belə ki, Missuri Dövlət Müdafiəçi Ofisinin məhkəmə tərəfindən təyin etdiyi vəkillərə hər iş üçün 12 000 dollar rüsum ödənilib ki, bu da edama gedən cinayət işləri üçün aşağı məbləğ hesab olunur.

Dorsinin müdafiəsi iddia edir ki, vəkilləri onu ölüm hökmü verilməyəcəyini təmin etməyən vəsatət müqaviləsi qəbul etməyə tələsdiriblər.

Keçmiş Missuri Ali Məhkəməsinin hakimi Maykl Volf qubernatora məktub yazaraq bildirib ki, Dorsinin edam edilməsi ABŞ-nin "ölüm cəzası sistemini ləkələyəcək".

Cəzaçəkmə müəssisəsinin 70-dən çox əməkdaşının imzaladığı petisiyada onun yaxşı davranışına görə cəzasının ömürlük həbs cəzası ilə əvəzlənməsinə çağırış edilib.

Ölümündən öncə verdiyi son açıqlamasında Dorsi qurbanlarından və onların yaxınlarından bir daha üzr istəyib.

"Heç vaxt kimisə incitmək istəməmişəm. Onları da, səni də incitdiyimə görə peşmanam", - o qeyd edib.