Son dəqiqə
İdman
23-11-2021, 16:27
451
Leonel Messi: ”Barsa”ya xeyrim dəyəcəksə, sevə-sevə qayıdaram"
![Leonel Messi: ”Barsa”ya xeyrim dəyəcəksə, sevə-sevə qayıdaram"](https://qaynarinfo.az/file/pic/xeber/2021-11/1637666204_xasde.jpg)
"Xavi "Barsa”da böyük işlər görəcək. O, uşaqlıqdan klubdadır və "Barsa”nı çox yaxşı tanıyır. Xavi "Barsa”nı yenidən ən böyük klub edəcək. O, "Barsa”ya olan inamı yenidən artırıb, çünki azarkeşlər və oyunçular ona çox hörmət edirlər. Xavi gənc oyunçular üçün də vacib biri olacaq, onları öyrədəcək. Xavi ilə komanda çox inkişaf edəcək. Buna şübhəm yoxdur”.
XəbərTv.info FCB AZE-yə istinadən bildirir ki, bu sözləri Leonel Messi "Marca”ya verdiyi müsahibə deyib. O, Xavi ilə tez-tez danışdığını bildirib:
"Klubdan getdiyi gündən onunla əlaqəm kəsilməyib. Qayıtması ilə bağlı yazdığım mesajda ona nə dedim, xatırlamıram. Sadəcə yadımdadır ki, təbrik və yeni mərhələdə uğurlar arzu etdim. Əlbəttə, onda hər şey alınacaq, çünki o, çox şey bilir və çalışqandır.
Məşqçilərə həmişə çox haqsız davranırlar. Bu, Kuman və Valverdenin də başına gəldi. Nəticələr pis olan kimi məşqçini günahlandırmaq, oyunçuları deyil, məşqçini dəyişmək çox asandır. Kuman kluba çox çətin və vacib oyunçular gedən dövrdə gəldi, amma buna baxmayaraq, gənc oyunçuları üzə çıxardı. Dediyim kimi, məşqçiləri günahlandırmaq çox rahatdır. Onlar da buna öyrəşiblər, çünki bu onların peşəsidir.
Sözün düzünü desəm, Alveşin geri qayıtmasına təəccübləndim, üstəlik, belə bir vaxtda. Düşünürəm ki, o, komandaya çox böyük xeyir verəcək və Xavi kimi gənclərə çox kömək edəcək. O, gənclərə inkişaf etməyin yollarını başa salacaq, çünki Alveş ruhən qalibdir, ehtirası, enerjisi və daima çalışması ilə həm meydanda, həm də ondan kənarda klub üçün böyük işlər görəcək.
Əlbəttə, "Barsa”nın riskli yerlərdə olmasına üzülürəm. Mən hər zaman klub üçün ən yaxşısını istəyirəm, çünki orada olmasam da, klubun azarkeşiyəm. Hələ də orada dostlarım var və buna görə "Barsa”nın hər zaman uğur qazanmasını istəyirəm. Düzdür, La Ligada "Barsa” çox xal itirdi, amma qarşıda uzun bir yol var və onların yenidən yuxarı pillələlərə qalxacağına şübhə etmirəm.
Klubdan getməyimin arxasında başqa səbəblər var, ya yox, bilmirəm. Getdim və hər şey geridə qaldı. Onlar mənə dedilər ki, müqaviləni yeniləyə bilmirlər və qala bilməyəcəm. Günahkar axtarmağa və keçmişə baxmağa ehtiyac yoxdur.
Laportanın İnyesta və mənim haqqımda dediklərinə qalanda, hər zaman demişəm ki, "Barselona” mənim evimdir, gələcəkdə orada yaşayacam və buna görə bir gün "Barsa”ya qayıdacağam. Əlbəttə, əgər kluba xeyrim dəyəcəksə, sevə-sevə qayıdaram".