Vidadi Muradov vəfat etsə də məhkəməsi davam etdirilir

Həbsdən buraxıldıqdan bir neçə gün sonra vəfat edən "Azərxalça”nın sabiq sədri Vidadi Muradovun cinayət işi üzrə məhkəməsi davam etdiriləcək.

XəbərTv.info Qafqazinfo-ya istinadən məlumat verir ki, bu gün Bakı Ağır Cinayətlər Məhkəməsində ailə üzvlərindən biri onun hüquqi varisi kimi çıxış edəcək. Cinayət işinə hakim Əfqan Hacıyevin sədrliyi ilə baxılacaq. İş üzrə "Azərxalça" ASC və Dövlət Vergi Xidməti zərərçəkmiş kimi tanınıb.

Vidadi Muradov bu ilin yanvarında həbs edilib. Sentyabrda məhkəməsi başlasa da, səhhəti ilə bağlı məhkəmə proseslərini keçirmək mümkün olmayıb. Onkoloji xəstəlikdən əziyyət çəkən V.Muradov oktyabrın 30-da ev dustaqlığına buraxılıb. Noyabrın 5-də isə evində vəfat edib.

V.Muradov Cinayət Məcəlləsinin 179.4-cü (mənimsəmə xüsusilə külli miqdarda ziyan vurmaqla törədildikdə) maddəsi ilə ittiham olunurdu. O, vəzifədə olduğu müddətfdə 3.5 milyon manat vəsaiti mənimsəməkdə şübhəli bilinirdi. Məhkəmə V.Muradovun 30 milyon manatlıq əmlakına həbs qoyub.

Xatırladaq ki, Vidari Muradov Sabunçu Rayonunun Polis İdarəsinin rəisi, polis polkovniki Cavid Muradovun atasıdır.